مش فاهمه

أروح ما أروحشى ....أروح ما أروحشى ....

2010-11-27T11:57:00.000-08:00

طول اليوم و انا على بالى غنيوة صباح و هى فى اول افلامها و متحيره تروح تقابل حبيبها اللى هو انور وجدى ولا ماتروحش

"أروح ما أروحشى اروح ما أروحشى لا لا لا لأ لأ لأ ما أروحشى "

انا بقه الأغنيه عماله تزن فى دماغى بس مش علشان متحيره اروح اقابل حبيبى ولا حاجه كفى الله الشر لأ انا متحيره اروح انتخب و اقابل نصيبى ولا ما اروحشى . الحكايه ابتدت من يجى اربع سنين كده لما طلعت بطاقه انتخابية علشان اكون مواطنه ايجابيه و مسئوله و فاعله و كل الكلام الكبير ده بتاع ضيوف العاشرة مساءا طبعا الدافع الرئيسى كان ما شهدته انتخابات 2005 و صولات و جولات نهى الزينى و زملائها اللى كشفوا تلاعبات و تزوير و محاولة خروج من حالة الأنا مالية المسيطره على الطبقه المتوسطه فى بلدى و بالمرة كمان علشان اكون فى نظر بناتى قدوة و مثال حى للأيجابية و حق تقرير المصير و بالرغم من ذكر حوادث ضرب البلطجيه للناخبين بالسنج و السيوف بس برضه كان الواحد مطمن شويتين قول تلاته لوجود قضاة .. المشكله المرة دى ان خلاص اشراف القضاة بقى بخ و الأمر كله بقى فى ايد الداخليه و بالرغم من انى و الحمد لله ماعنديش مشاكل مع الداخليه و بالعكس كنت كل مرة باقابل ضابط او حتى عسكرى احرص ان بنتى تسلم عليه و تعرف انه موجود علشان حمايتها و حمايتنا كلنا بغض النظر بقه هم بيعاملوا الناس التانيين ازاى لكن قدامى الناس ذوق ذوق ذوق الصراحه حتى قبل كده واحد ضابط مرة شافنى محتاسه بالعيال و مش عارفه اوقف تاكسى الراجل مشكورا وقف لى التاكسى

لكن و اه من لكن فيه خوف مسيطر عليا مش عارفه ليه يمكن علشان الخطوات الأستباقيه بتاعة عدم وجود كاميرات حيه فى الشوارع و الشلوت اللى اخده عمرو أديب و التدجين اللى بقت عليه منى الشاذلى و غيره و غيره من الحركات المقلقه دى و بالرغم من القلق ده كله بقالى يومين بادخل على النت ادور على اسماء المرشحين فى الدايره بتاعتى علشان اعرف اصل و فصل كل مرشح و مين تبع حزب ايه و مين اللى متخفى يعنى عامل فيها مستقل و هو مش مستقل و لا نيله و كل كلامه و حبه و هيامه باين من كلامه و انجازاته واحد فيهم نازل مستقل و هو متبرع بارض له للحزب و صارف ملايين فى حمله تغيير الماده 76 و مين اللى مهتم تبقى له صفحه على النت و طبعا ولا الهوا قليل قوى اللى له صفحه على الفيس بوك و الباقيين عارفين ان وراهم الحزب و العيله و القبيله كنت حريصه اعرف مين اللى الحزب الوطنى لم يرشحه بس منزله برضه لتفتيت الأصوات كنت عايزه اعرف كمان وظيفة كل مرشح ولا بتوع الكوته دول كمان كل واحده متصورة و على وشها طن ماكياج و حاجه مستفزة الحقيقه عايزه اعرف كل واحده ايه كنيتها ......للأسف كنت باتمنى لو ناس كتير تترشح و ماتقاطعش الأنتخابات و مش قادره استوعب قوى قرار مقاطعه الأنتخابات لعدم وجود ضمانات طيب وهو ايه الجديد يعنى طيب اهى حاتتقام كده كده و اللى مش عاجبه يدور على اكبر حيطه و يضرب دماغه فيها ........بجد الموضوع محير و يخوف لكن بجد ايه اللى ممكن يحصل طيب المرة اللى فاتت روحت انتخابات الشورى بس بعد العصر كده الدنيا كانت رايقه و هاديه و تقريبا ماكانش فيه غيرى و المشرفين على اللجنه كانوا لطاف كهم مصريين معجونين زينا حتى الضباط و العساكر اللى بره اللجنه كان شكلهم عادى يعنى بس دوكهه شورى يعنى ولا مؤاخذه اللى حاينجحوا زى قلتهم ......لكن المرة دى الموضوع يخوف اكتر لدرجه انى بافكر اخد العيال معايا و اعملهم درع لحمايتى علشان لو روحت اللجنه و اتضربت ولا حاجه العيال يصوتوا و يعيطوا اقوم اصعب عليهم و يسيبونى
متهيألى الأفضل اقوم الصبح و اقعد اتفرج على الأخبار و خصوصا فى الجزيره و البى بى سى و اشوف فيه قلق و لبش ولا الدنيا رايقه و هاديه و اقرر بعدها لو حأروح البس العبايه و تحتها جلابية البيت و الشبشب علشان وانا داخله اللجنه ما استفزش الأخوة المشرفين على اللجنه و يفتكرونى لا سمح الله من الناس اللى عارفه حقوقها وواجباتها و عايزة التغيير و بالمرة البس معاهم الوش العبيط اللى ساعات بينفع مع بتوع الميكروباصات و يفتكرونى من اللى واخدين خمسين جنيه مقطعه و يسيبونى فى حالى او الأختيار التانى انى اكفى خيرى شرى و الزم بيتنا تبعا لقول بعض الفقهاء ان افضل للمرأة ان تلزم بيتها و اتظاهر بالمغص و اقول لعيالى انا مش حأنتخب و مش حأشارك المرة دى بس اوعدكم المرة الجايه حأشارك مشاركه اخر تلات اربع حاجات. ويارب الغنوة دى بقه تبطل زن
"اروح ما اروحش اروح ما اروحش لأ لأ لأ لأ لأ ما اروحشى "

شيزوفرينيا

2009-01-10T04:54:00.000-08:00

من ساعة موضوع غزة و اللى بيحصل فيها و موقف مصر المتخاذل من اللى بيحصل و انا ضميرى بيوجعنى جدا و عندى احساس فظيع بالذنب و كل شويه و التانيه تطلع العيبه من بقى فى حق الصهاينه و من والاهم من حكامنا العرب لا استثنى منهم احدا .المشكله اللى بتواجهنى هى مصارحة بناتى بحقيقه موقفنا كمصريين مع اللى بيحصل و بيشوفوه فى غزة مع الأخذ فى الأعتبار و احنا بنذاكر مواد اجتماعيه و تاريخ انى ياحاول اعظم فى قدرات مصر التاريخيه و الحغرافيه و ان اللى قضى على الصليبيين و التتار جيوش المسلمين و على رأسهم الجنود المصريين اللى الرسول اخبرنا بانهم خير اجناد الأرض و طبعا مافيش مانع من جعلهم يفخروا بمصريتهم و بان مصر هى امى و نيلها هى دمى لكن للأسف خبت جدا و احترت و انا مش عارفه اجاوب على تساؤلاتهم ليه مش بنساعدهم ليه ساهمنا فى حصارهم و ليه كلنا كمسلمين مش بنقف معاهم .......ولما فشلت و خفت عليهم احسن واحده فيهم تطلع اسرار البيت من شتيمه و حنق و غضب على اللى بيحصل مننا فى اخواننا فى موضوع تعبير زى الاء كده البنت اللى شتمت فى بوش و الريس .................قررت نمتنع عن مشاهدة قناة الجزيره و المنار و صحف المعارضه و نكتفى بمشاهدة نشرة اخبار قناة النيل للأخبار و مطالعة الأهرام و اسامه سرايا و احمد موسى و سماع اغنيات المصريين اهمه و نرسل كام جنيه لنقابة الأطباء و نتغطى كويس و ننام

لما النت عندى وقعت

2008-12-20T13:17:00.000-08:00

بما انى مدمنه نت و معترفه و اعترافى سجلته هنا

http://moshfahma.blogspot.com/2007/01/blog-post_11.html

بالتالى كان وقوع النت بمثابة صدمه بس لما فقت

منها ابتديت افكر فى امور عديده و نورت فى دماغى مناطق كتيره عازياكم تشاركونى فيها

- طبعا اكتشفت مساحه اكبر من الوقت للأتصال بالأهل و الأقارب و الأصحاب الحقيقين و محاولة الأطمئنان على قدرتى على التواصل مع ناس من لحم و دم شفتهم و شافونى مش شخصيات افتراضيه تكونت بينى و بينهم على مر الأيام مشاعر حقيقيه ين حب و كره و اعجاب و نقد و معارك مشتركه و مشاحنات يعنى هم افتراضيين بس مشاعرى انا حقيقيه حاجه تلخبط بجد يعنى ايه اللى يضمنى ان اللى باكلمه على انه رجل يبقى ست او ست تبقى راجل او صغير يبقى كبير او العكس و هل المواضيع دى حاتفرق ولا لأ حاجه تحير بجد

- اكتشفت فشل موضوع التأريخ الشخصى على النت يعنى ان الواحد يسجل خواطره و اراؤه و انفعالاته كل ده على النت سواء بمشاركات فى مواقع او على البلوج الخاص لأن فى لحظه ممكن كل ده يطير و يصبح هباءا منثورا اترعبت لما تخيلت ان تاريخ علاقتى بالنت و الشخصيات اللى ارتبطت بها نتيا كله ممكن يضيع و لا يبقى شئ ممكن اقرأه بعدين او اتركه لأولادى يشوفوا امهم كانت بتهبب ايه كل يوم و هى سايباهم و قاعده على النت تهاتى فى سياسه و دين و علم نفس و فى الأخر لو حدثت مشكله ما ابقى كأنى ماسكه الهوا بايديا

- اكتشفت ان غالبية الناس من حولى مش حاسه قوى بغياب النت ولا تأثيره و اكتشفت حكمة الدوله فى خفض اسعار النت علشان المثقفين و المهمومين بمشاكل وطننا و مجتمعاتنا و المعرضين للأكتئاب فى كل لحظه لو اعملوا عقلهم دقيقه انهم يلاقوا مكان مناسب جدا للفضفضه و تبادل الأراء و الحلول مع بعضهم البعض فقط و ممكن التدخل أحيانا من جانبها بشعلله بعض المواضيع او اطفاء مواضيع حيويه و هامه بتفريعها الى مشكلات جانبيه و صرف النظر عنها او اطلاق مشكلات مفتعله لتفريغ شحنة الكلام و الفضفضه و كل ده و الناس اللى بيعانوا حقيقة و بجد اصلا مش بيعرفوا يفكوا الخط مش يقعدوا على الكمبيوتر و يشوفوا ايه المشكله و حلها

- طبعا افتقدت ميزة قرأة الأخبار و الصحف على النت و لأنى على النت باقرأ مقالات الكتاب اللى باختارهم ...طبعا اضطرارى القسرى انى اشترى الجرائد المطبوعه جعلنى غصب عنى عينى تقع على مقالات باقلام كتاب و صحفيين خسارة الواحد يجيب اساميهم حتى

ياترى الناس فكرت فى ايه و عملت ايه لما النت عندهم وقعت

عالم جزم جزم جزم

2008-12-15T14:45:00.001-08:00

عجبتنى قوى حركة ضرب بوش بالجزمه و دخلت دماغى جدا - الحركه طبعا مش الجزمه - و تمنيت لو احدف كل واحد ظالم او فاجر او كاذب او مش عاجبنى أداؤه او مش بيقوم بواجبه او بيشتغلنا او بيستغلنا .................يااااااااااااااه ده انا حأجيب جزم تكفيهم منين بصراحه الكتير يستاهلوا ينضربوا بالجزمه

صفحة الوفيات

2008-12-11T02:28:00.000-08:00

من زمان كنت اجد ابى اول ما يقرأ هو صفحة الوفيات بحثا عن صديق او قريب توفاه الله ووجبت تعزية اهله و مواساتهم او مواساة الصديق نفسه فى عزيز لديه ...........و من ضمن صفات كثيره كنت اخذها على الوالد رحمه الله و على الوالده اطال الله فى عمرها اصبحت احملها جميعها حاليا من ضمنها مثلا ضرورة عدم ترك اى ضيف ينزل من بيتنا دون تقديم واجب العشاء له و كأنه مش لاقى يأكل -هذا ما كنت اقوله وقتها - او احنا عندنا اللى يادوب يكفينا و هكذا

ماعلينا اصبحت الأن قرأة صفحة الوفيات من اوائل ما اقرا فى جريدة الأهرام الأن اللى لولا الملامه كنت قصيت صفحة الوفيات و رجعتها للبائع مرة اخرى بعد ان حل احمد فتحى سرور بديلا لفهمى هويدى و بعد ان اصبح مقال رئيس مجلس الأدارى بالعرض فى الصفحه الأخيره حاجه تكسف و الله

ماعلينا للمرة الثانيه موضوع صفحة الوفيات مما له من ميزات واجب التعزيه و مواساة الأهل و الأقارب و الرؤساء فى العمل اصبح بالنسبه لى ماده خصبه خياليه و مرجع جميل لبعض العمليات التحليليه و الأحصائيه السريعه امثله على ذلك :

- عند وفاة احد رجالات الدوله و تقرا نعيه و تعلم هو مشغل ابنائه فى مناصب شكلها ايه و اتخيل الواسطه عملت ايه معاهم و كم الفرص اللى ضاعت على من يستحقون

- أعرف الرجل المحترم لما اجده وهو من كان فى منصب رفيع و لكن اولاده و اقاربه عاديين و ممكن ان يكونوا من اساتذه الجامعات او عاملين بالخارج

- فى نعى لأحد رجال التعليم انه اب لسبعه سيدات كلهن طبيبات و يشغلن مناصب جامعيه قمه فى الأحترام و افضل اسرح اكيد كان نفسه فى ولد و اكيد كان طول الوقت مهموم و حزين او عائلته بتعايره بخلفة البنات و علشان كده البنات تفوقن ليثبتن للجميع انهن لسن اقل من الأولاد

- صورة فى النعى لرجل يبدو عليه ان عنده اعاقه ذهنيه و اكتشف انه اخ لعدة شقيقات و اسرح مرة اخرى فى حكمة ربنا ان يرزق والديه بخلفة الأولاد بعد خلفة البنات و مع ذلك يطلع الولد معاق ذهنيا سبجانك يارب- طبعا اقسى ما أجده هو وفاة شباب اثر حادث اليم و يطلع فى جامعة خاصه و التى توجد على اطراف القاهرة الكبرى و اكيد الطرق السريعه و عدم وجود رقابه مروريه هو السبب و اكيد الولد كان بيلح على شراء العربيه و هو مش عارف انها على ايدها نهايته و ياترى مين اللى شجعه الوالد ام الوالده و ياترى مين اللى حاسس بالذنب دلوقتى و طبعا لو وجدت صورة فتاة فى نفس الصفحه اثر حادث اليم ايضا يبقى اتخيل انهم كانوا مع بعض و مدى الأحراج اللى ممكن يكونوا اتسببوا فيه لأهاليهم

- وفيه نعى اقارب كبارات رجال الدولهاللى بيبقى بالصفحتين و التلاته و فيه نعى كبار رجالات الدوله انفسهم و دول بقه يا حرام النعى سطرين تلاته و دمتم

- و فيه نعى الموظفين اللى فى الأهرام اللى صورهم بتدل على تواضع مستواهم و اللى باستنتج انهم ياحرام قضوا طول عمرهم ياخدوا مرتبات على قدهم فى سبيل ان نعيهم ينزل فى الأهرام بعد عمر طويل

- و فيه طبعا استمبات للنعى زى اللى بيعمله على السمان مثلا فى عزاء المشاهير من الفنانين و الأدباء لازم يكتب له ربع صفحه

- و فيه غرائب فى النعى مثل نعى الفنان محمود مرسى اللى اتكتب فيه اصدقاؤه .........و هكذا افضل انسج القصص و الروايات و كله من صفحة الوفيات

ناولينى الشوز ....يا اختشى

2008-12-05T13:18:00.000-08:00

فى عملى فيه موظفين معاهم دبلومات و متوسطى الشهادات و اندهشت جدا و احنا بنتوضى مرة ان كلهن تقريبا بيقولوا على الجزمة ولا مؤاخذه شوز
واضح ان موضوع تطعيم المحادثات بكلمات انجليزية موضه وعلى كل المستويات ليه التكلف و التحدث بالأنجليزيه بالعافيه علشان نبين مدى ثقافتنا و مستوانا الأجتماعى بالرغم من ان معظم الدول المحترمه يصر مواطنيها على التحدث بلغاتهم رسميا و شعبيا و ده اللى خلانا نصر نعلم اطفالنا عدة لغات فى بدايه حياتهم مع اهمال اللغه العربيه و ده اللى بيسبب لهم الأرتباك و عدم القدره على التعبير عن ارائهم بطلاقه و حريه
اقولكم اللى فكرنى بالموضوع ده ختام مهرجان القاهرة السينمائى و كل نجم و نجمه مصريه اصر يصر اصرارا انه يقدم الفائزين و الأفلام باللغه الأنجليزيه اللى ظهر جدا مدى تواضع مستواهم فيها طيب و كان ليه من اصله
اللى احترمته جدا جدا خالد صالح اللى الوحيد اللى قدم الجائزة باللغه العربيه و اللى قدرته جدا بعد الحركه دى

بكلمة منك

2008-07-18T11:53:00.000-07:00

أغنية شيرين الجديده بكلمة منك ...لمستنى جدا لحنها و كلماتها و فكرتها خلتنى اتسائل هل فعلا ممكن بكلمة واحده من الحبيب نتطمن و تشيل الهم و تخلى الواحد يعمل حاجات مش بيحبها كل ده بكلمه من الحبيب ...... الأفعال مهمه جدا لكن الكلام فى رأيي اهم
الأفعال هى الواجبات و المسئوليات لكن الكلام محتاج قدرة و تدفق و استمراريه فى المشاعر و كرم فى التعبير عنها
ليه الحبيب فى اول الحب بيتكلم كتير و بيهتم و بيطمن و بيرسم بالكلمات المستقبل و ليه الحبيبه فى اول الحب بتسمع اكتر و بتتشد للكلام و الغزل و الحب و الوعود و بتصدقها كلها و ممكن تنسى شروط كانت بتضعها على فارس الأحلام و بتنسى احلامها و طموحاتها علشان كلام الحبيب اللى بيطمن و يديها الأمان و بعد كده لما الحب بيتحول لزواج بيخلص الكلام و يتحول المتكلم الى مستمع دائم و المستمع الى متكلم دائم و كأن ده قانون غير مكتوب اتكلم انت قبل الجواز و اسكت خالص بعده و انتى اسمعينى و صدقينى و اطمنى و بعد الجواز اتكلمى و انا ولا هنا ........انا عاذراك ايها الرجل و الزوج الدنيا فعلا بقت قاسيه و الحياة صعبه لكن بجد الكلام مهم ليه البخل بكلمه و خصوصا للمرأه المحبه اللى اتعودت على كلمات الحبيب فعلا ممكن هموم تتشال و مصاعب تتعمل بحب و جبال تتشال بسهوله بكلمه منك ايها الحبيب الصامت

كلمات الأغنية
بكلمه منك .. تنسيني الي عدى آوام .تخليني احس بقيمة الايآم .. تطمني لسنين قدآمبكلمه منك .. توريني الي مش شيفآه .. تريحني من الهم الي انا شيلآه .. تعيشني الي مش عيشآه كآن فين .. هوآك من بدري يا حبيبي .وكل دآ فين .. دنآ من قبلك انا عايشه مع العايشين بكلم نفسي من الوحده بقآلي سنين .. وآنآ في ضيقتي مكنتش عارفه اشكي لمين ودي الوقت وانا بعمل حسآب بعدين .. ودي الوقت عرفت ابدآ حيآتي منين ......بكلمه منك عرفت انا دنيا معرفهاش.. عشان خطرك بحب حآجآت ماحبيتهآش.. ولو تندهلي مستنآش ...بكلمه منك لقيت كل الي مش لقيآه .. ولو في حد زعلني انا مسمحاه .. ولو فيه جرح انا حنساهكآن فين .. هوآك من بدري يا حبيبي.. وكل دآ فين .. دنآ من قبلك انا عايشه مع العايشين بكلم نفسي من الوحده بقآلي سنين .. وآنآ في ضيقتي مكنتش عارفه اشكي لمين ودي الوقت وانا بعمل حسآب بعدين .. ودي الوقت عرفت ابدآ حيآتي منين

الأحلام المؤجله

2008-04-04T15:30:00.000-07:00

عندى يوم فى الأسبوع باذهب فيه الى مدينة 6 اكتوبر لألقاء محاضرة هناك و فى هذا اليوم باركب عربيات 6 اكتوبر من موقف اسكندريه فى الهرم . و فى كل اسبوع و انا داخله الموقف يسألنى احد السائقين اسكندريه يا مدام و فى مره ابقى على وشك اقوله ايوه و بعدين اتراجع و انا عارفه ان فيه ناس مستنيانى و انى لازم ارجع فى وقت معين علشان اجهز الغدا للأسره و ان عندى التزامات اسريه و مهنيه و عائليه لازم اقوم بها و افضل طول الطريق افكر ايه اللى ممكن يحصل لو ركبت عربيه اسكندريه و قضيت عدة ساعات و بعدين اخد بعضى و ارجع عادى بعد ما اشم هوا البحر و اكل اكلة سمك معتبره و خلاص
بتتكرر الأحلام دى لما ينزل فيلم جديد مثلا فى السينما و ابقى نفسى انشل نفسى من المشاغل و الهموم و اقطع تذكره ان شاالله من 10 لواحده زى اللى بيهربوا من المدرسه و الحبيبه الصغار و افضل افكر فى الموضوع و اخد و ادى مع نفسى لحد ما الفيلم يخلص من السينما و اشوفه على الكمبيوتر بعد كده .
و هكذا بتترواح احلامى المؤجله من اول مشوار اسكندريه لحد انى مثلا املا البانيو و اغطس فيه ساعه واحده بس مرورا بموضوع السينما
مش عارفه امتى حألاقى وقت و امتى حااتشجع و امتى حأرمى كل المشاغل و المسئوليات و الهموم و اعمل حاجه لنفسى انا

المكنه طلعت قماش

2008-03-29T05:33:00.000-07:00

قليلة جدا اللحظات اللى بتحس فيها ان مجهودك و تعبك و شقاك بيجيبوا نتيجه .العكس هو اللى بيحصل غالبا و يمكن لأن طبيعة عملى مافيهاش نتائج مباشره لكن مع بناتى و مع اشتراكهم فى فريق السباحه و ذهابى و مجيئى يوميا فى المواصلات و شايلين عدة السباحه و القعده و المراقبه لحين انتهاء التمرين مع متابعة ردود افعال الكابتن و من حولى -دول حكايه تانيه كل ام محتاجه قصه لوحدها- و من ثم الأستحمام و تسريح الشعر و لم الحاجات من شباشب لمايوهات و المبلول فى كيس و الناشف فى كيس و اللى نص نص فى كيس و اكل السندوتشات اللى قعدت اجهزها قبل النزول فى ساعه و طبعا لازم انضف قبل ما انزل و الا ارجع الاقى الدنيا تضرب تقلب و الرجوع فى المواصلات مرة اخرى مع قرف التاكسيات و اشتراطاتهم و بلطجة الميكروباصات و بعدين المذاكرة فى السريع السريع و النوم هلكانه ثم معاودة الكرة مرة اخرى ....الكلام ده بيحصل فى الشتا فى عز البرد و المطره و فى الصيف فى عز الحر و فى عز الرطوبه و الشمس بيحصل الساعه 6 الصبح و الناس نيام و الساعه 10 بالليل و الناس نايمه و متغطيه ......طبعا الزيارات العائليه قلت بل كادت تنعدم و الشغل و الترقيات نسيتها تماما و الأكل المسبك و الطبيخ و الذى منه نسيناه تماما كل ده فى سبيل اليوم الموعود .....يوم البطوله .....
و اخيرا و بعد كل ده جاء يوم البطوله جوزى اخد اجازة و استأذنا من الأمتحانات فى المدرسه و اعدينا العده من اكل و عصير و لبس و مايوهات كتيييييييييييييير واحد للتسخين و التانى احتياطى و ايشى نضارات و بونيهات و برانس و مراتب و شنطه سفر ما اخدتش زيها لما روحت الحج ....المهم كأننا رايحين الأوليمبياد و كل ده و اعصابنا و اعصاب البنات مشدوده و بعد ده كله استغرق الأمر 40 ثانيه هى مدة السباحه 50 متر و طبعا لا جبنا ميداليه ولا حاجه لكن ماهى الا ثوانى حطمنا فيها رقمنا السابق -باقول رقمنا و كأنى انا و بنتى كنا بنعوم مع بعض- و حققنا مركز احسن شويه فى الفريق رغم اننا ولا اخدنا دروس خصوصيه زى الباقيين ولا جيم ولا حاجه ....يعنى بالمختصر المفيد رقم مش بطال لكن بالرغم من كده كنت سعيده جدا ان مجهودى ماراحش هدر و ندمت انى ما اشتركتش فى سباقات اكتر ...... .......بجد لحظات السعاده فى حياتنا قليله لكن بتفرق بجد ........بعد التعب ده حسيت ان الموضوع يستاهل و عذرت الأمهات اللى كنت باشوفهم مع اولادهم الكبار و اللى اشتركوا فى بطولات قبلنا و كنت باستغرب ايه اللى مصبرهم على التعب ده و ليه مش بيسيبوا الموضوع ده لحاجات اهم و كنت اوصمهم بقله العقل اما انا فلى عذرى انا داخله الموضوع تجربه لحد اول بطوله و بعدها يا فكيك...............دلوقتى لأ الموضوع مختلف انا دلوقتى مستعده لدورة جديده من اللف و الدوران و الهلكه و المواصلات و التضحيه بالشغل و بالزيارات العائليه و بأكل المحشى و بكل متع الحياه و كله يهون فى سبيل ان الحلوة تتكلم و تطلع قماش

تحيه واجبه

2007-11-13T13:23:00.000-08:00

تحيه لكل الناس اللى بتتابع البلوج ده بس للأسف كان بقالى مده مش بادخل .شكرا لهم و لو انى ماكنتش متخيله ان ممكن فى فضاء النت ده ممكن الاقى عين تتابعنى او شخص يضيع من وقته دقائق للمشاركه معى و مع عدد كلماته القليله لا يتخيل كم السعاده اللى بيحققها لى ...............شكرا لكم

الزحمه عدوة الرحمه

2007-11-13T13:11:00.000-08:00

ايه اللى بيحصل فى الشوارع ده و ايه كم العربيات و الناس و الأتوبيسات و الميكروباصات .........ايه اللى اتغير الناس زادت فجأة ولا العربيات الملاكى زادت و لا المواصلات العامه قلت ولا مافيش ظباط مرور فى الشوارع .......فيه ناس بتقول العراقيين و السودانيين و اللبنانيين اللى ملوا البلد هم اللى زحموها .....فيه ناس بتقول لأ الناس اللى بترجع من الدول العربيه مطروده او من اوروبا و الدول المتقدمه بعد 11 سبتمبر .........قيه ناس بتقول لأ لما العربيات رخصت ..........مافيش شارع فيكى يا مصر الا لما بقى زحمه و طبعا الزحمه بتولد اخلاق بين الناس اسمها اخلاق الزحام عصبيه و انفلات اعصاب و تحرش و تأخر -زياده عن ما احنا متأخرين-....ازاى ممكن ناس تشوف شغلها و تنتج و تتعلم و هى على طول اما متأخره او متعطله او متخانقه او او ...............انا شايفه ده نوع من عدم احترام الناس لازم ضباط المرور يزيدوا لازم مواصلات عامه كويسه و محترمه لازم رقابه على الميكروباصات علشان الناس تتنازل عن العربيات الملاكى شويه شويه لكن ازاى يولعوا الناس لو مسئول صغير رايح يشترى حاجه من السوق يوقفوا الناس و الحياة و الدنيا كلها بلا شغل بلا تعليم بلا وجع قلب .....................بجد اهلى مابقتش اشوفهم ايه اللى يخرجنى فى الزحمه و انا كل مرة اخرج مش باعرف ممكن ارجع امتى من اسبوع اتحبست فى شارع السودان ساعه و قبلها فى شارع الجامعه ساعه و كذلك نزول المحور ولا فيصل ولا الهرم .....بجد الخروج دلوقتى بقى مخاطرة و مغامرة و قلته احسن ........و صدق المثل اللى بيقول من خرج من داره اتقل مقداره

حكاية فاطمة و منصور

2007-02-05T16:13:00.000-08:00

من زمان و كلنا بنردد قصص المحبين و المحرومين مثل قيس و ليلى و عنتر و عبله و حسن و نعيمه و بيدخل الخيال مع الحقيقه و فى النهايه بتتصنع الحدوته التى لم نعشها و لكنها فى وجدانناتظل خالده تدل على الحب و التضحيه من جانب المحب لمحبوبته ....و لم اكن اتخيل ان اعيش فصه مثل هذه القصص و لكنها فى هذه المرة لا تثير فى نفسى مشاعر الحب و الرومانسيه و لكنها تثير فى تفسى الغضب و الحنق و الشعوربالظلم و باليأس من انصلاح احوالنا ....
القصه هى قصه فاطمه و منصور الزوجان المتحابانالسعوديان و المتزوجان على سنه الله و رسوله و عندهم طقل و طقله و لكن اخوة فاطمه غير الأشقاء رفعوا قضيه للتفريق بينها و بين زوجها لعدم تكافؤ النسب بينهما و القاضى حكم بالتفريق غيابيا و لما عرفوا بالحكم بعد سبعة اشهر حبس الزوجان لأن حياتهما الزوجيه اصبحت خلوة غير شرعية و حكم بالحبس عليهما و حتى الأن فاطمه ترفض ان تخرج من السجن لأنها ترفض ان تفترق عن زوجها و لا تريد العودة الى بيت اهلها ...
اى شعور بالظلم و اى دين يتحدثون عنه و يعرفون بانهم ارض الأسلام ...طول عمرنا متأكدين من انه لا فضل لعربى على اعجمى و لا ابيض على اسود الا بالتقوى و العمل الصالح الرسول عليه الصلاة و السلام زوج مولاه من ابنة عمه ذات الحسب و النسب .....الناس دى عايشه فى اى عصر و تتبع اى دين.....انا قرأت من اسباب القاضى ان هناك مستويات من السعوديين انفسهم و قبائل فوق و قبائل تحت و اعمال مثل الحياكه و غيرها تدنى من شأن صاحبها و اعمال اخرى لا ......اى ظلم هذا و اى عنصريه هذه ...نسب ايه و تكافؤ ايه و امام هذا تهد بيوت و تتشرد اطفال .....لماذا يؤخذ رأى المرأة فى الزواج ولا يؤخذ رأيها فى الطلاق ....هل هذه المرأة التى اوصى بها الرسول .......و كم قضيه يمكن ان يتعنت فيها اللأخ او العم او الأب مع المرأة .......
اذا لم تكن هذه هى الجاهليه فماذا تكون الجاهليه .......
ياترى يا فاطمه حاتجدى العدل فى الدنيا...... ياترى يا فاطمه حا ترجعى لزوجك و حبيبك ....ياترى يا فاطمه حاتقدرى تصبرى .....
قلبى معاكى يا فاطمه و بادعو لك بجد
دلوقتى نقدر نقول و بقلب جامد عندنا قصه حب جديده فيها ظلم و جهل و تعنت و عنصريه قصة فاطمه و منصور

كل هذا الغل = كل هذا العند= كل هذا الحب

2007-02-03T00:40:00.000-08:00

صديقتى المطلقه حديثا و اللى زوجها ظلمها جدا -من وجهة نظرها- قالت لى فى اخر مرة طلبت منه نقود و لم يعطينى دعيت ربنا انه ما يرجعش لعقله و ضميره و انه يتركه يظلمها هى و بناتها فى الدنيا حتى يموت علشان يوم الحساب ينتقم منه شر انتقام هل يمكن ان يدعو انسان ربه الا يعود من ظلمه الى ضميره و ان يتركه فى طغيانه يهمع و يطغى اكثر و اكثر علشان الحساب يجمع فى الأخر ...وتذكرت دعاء سيدنا موسى ان يؤجل الله حساب فرعون الى الأخرة من كثر ما ناله منه من ظلم .....معقول كل هذه الغل
انا شخصيا عندما ارى هذا الغل و الكره بين اتنين اعلم تماما انه كانت هناك مشاعر كبيرة بينهما لأن من يحب جدا يكره جدا و من لا يهمنا امره لا نفكر فيه سواء بمشاعر ايجابيه او سلبيه لكن ان تتمحور حياتنا حول شخص واحد سواء بالحب او الكره يبقى هذا الشخص مهم و ايضا لو خابت توقعاتنا الكبيره فى انسان ما قد تتبدل مشاعرنا تجاهه دون تفسير ....صديقتى كانت تحب زوجها جدا و تحدت الأهل و تزوجته و صدمت فيه ...اعتقد ان صديقتى مازالت تحب زوجها السابق جدا بالرغم من كم الغل تجاهه و اعتقد ايضا انها تنتظر كلمه منه قد تذوب هى بعدها و قد يعود حبها له اقوى من الأول ...كثير اتعجب وانا متأكده ان النساء مشاعرهن و العاطفه عندهم بتحكم على كثير من الأمور اكثر بكثير من العقل و خاصة تجاه من يختاروه حبيب و سند و رفيق وبالتالى يتوقعون منه الكثير ولو لم يحدث المراد تكون الصدمه و قله الحيله -ناقصات عقل بقه- فعلا التفكير بالعاطفه مهم احيانا كثيرة و صادق فى احيان كثيره لكن لابد من شويه عقل يضبطوا المواضيع ....لكن كل هذا الغل وراءه كل هذا العند ... وراءه كل هذا الحب

دع القلق

2007-01-27T14:32:00.000-08:00

القلق هل هو شئ صحى ام شئ مرضى الأن فقط ادركت ان القلق مرادف لعدم الثقه بالنفس فى الماضى كنت على يقين ان القلق مرادف للرغبه فى الوصول الى الكمال و كلما زاد قلقى كلما ازداد تجويدى للأشياء جايز جدا يكون الكلام ده حقيقى فى مجالات كالدراسه او العمل او الفن لكن فى الحياة و العلاقات الأنسانيه القلق شئ مرضى قد يؤخر قرار مصيرى او يؤجل سعادة ما .....بجد علاقتك بانسان ما لا تخضع لمعايير مثل ماذا لو حدث كذا اليس من الممكن ان يكون كذا او النظر الى تجارب السابقين .....التجربه الأنسانيه هى خير دليل على نجاح علاقه ما او فشلها و ممكن بايدينا ننجح علاقه ما او لا .......التجربه و التجربه فقط نختصر الأيام و نسعد او نشقى المهم الا نؤجل مشاعرنا و احاسيسنا و سعاده قد تأتى و تغمرنا و تغير من حياتنا ......بجد القلق شئ سئ جدا و يعكس حاله عدم ثقه بالنفس و عدم ثقه فى الخالق و ما قدره لك ..........استخير الله و توكل و ابدأ فى طريقك و كما يقولون دع القلق و ابدأ الحياة

شيكاجو

2007-01-14T00:32:00.000-08:00

قرأت رواية شيكاجو مسلسلة لعلاء الأسوانى فى البدايه انبهرت بالشخصيات و خلفياتها و باستمتع باسلوبه فى تقديم الشخصيات يجيب اصل و فصل كل واحد من غير غموض مالوش لازمه لأ فيه وضوح و بناء حلو و مبررات لكل شخصيه و البيئه اللى اخترها للمصريين فى الخارج و الدارسين منهم و اختلاف و تنوع مستوياتهم واحساسى انهم شخصيات من لحم و دم عارفاهم و سامعه عنهم و مروا امامى و خصوصا انى قريبه من المجتمع ده و كله جميل
لكن اللى صدمنى بجد بعد كام حلقه كم المشاهد الجنسيه الصريحه جدا و الفجه جدا و اللى لو اتقطعت من الروايه تعمل روايه برونو محندقه كده اخر تمام ......مش معقول بجد ...و مش عارفه ايه المبرر الدرامى لهذا مع انه ككاتب موهوب ممكن يعبر بطريقه انعم من كده عما يريد قوله بجد بعد شويه ابتديت الوم نفسى على قرأتى لهذه الروايه ...و متابعتى لها و اعجابى بها اللى قادنى فى النهايه لصدمتى فيها ......وقلت اى متعه اخدتها فى قرأتى لشخصياتها و معايشتى لهم بصراحه تولع مع معرفتى لأدق تفاصيل ممارسة افعالهم و اللى فى النهايه لا كانت حاتودى و لا تجيب و كان ممكن استنتجها ببساطه بخيالى دون المباشرة فى التعامل معها هكذ........باختصار يغور الأدب من قلة الأدب

أنا مدمنة

2007-01-11T13:01:00.000-08:00

ارتحت جدا لما اعترفت لنفسى انى اصبحت مدمنة انترنت فعلا انا مدمنة و اتأكدت من اكتر من اختبار ,,,,اول ما اقوم الصبح افتح عينى على النت اقرأ الجرايد و المواقع الألكترونيه اللى مسجلاها عندى ثم على الكام منتدى اللى مسجله فيهم اشوف مين رد و مين ما ردش و فلان كتب ولا لأ و فلانه رجعت ولا لسه ......و لما الأولاد يصحوا نبتدى الكر و الفر اضع الشاى يجهز و انا على النت ...حلوا المسأله الفلانيه على ما ابص بصه ....اتكلم فى التليفون و انا باقرأ الموقع الفلانى ....خلصنا ياماما حلوا الأمتحان اللى بعده .....بس انتى لسه ما صححتيش اللى قبله مش مشكله ابقى اصحح كلهم مع بعض وطبعا مش بيحصل ..كل ده و انا مش هنا و لسه باقرأ و اقرأ ...اضع الأكل على النار و ادخل على النت حتى نوم الظهيره ضحيت بيه علشان عيون النت و البيت بيبقى هس هس ......واحده تكلمنى عن اشاعة ما تعرفى عنها حاجه ادخل اجيب اصل الموضوع و فصله ....درجات الحرارة و نلبس ايه بكرة شرحه من على النت .......مشتاقه لأغانى الذكريات شبيك لبيك افتح و اسمع الأغانى و اجيب كلماتها كمان من الموقع الفلانى و استرجع الموسيقى و الألحان اللى كنت باعشقها ......و لو كلمه فى الفرنساوى اللى مش فاكره منه حاجه و مش شايفاها فى ورق مراجعة الأولاد افتح موقع تعلم الفرنسيه اشوفها و اشوف شرحها و تمارين عليها كمان و اقوم و كأنى خريجه السكاركير و بالنطق كمان....مش فاهمين دورة حياة البلهارسيا اكتب الكلمه و بسرعه الاقى الشرح بالصور و الألوان ولا اروع .........اعمل اكلة ايه النهارده افتح على موقع طبيخ اجيب الوصفه بالشكل النهائى بتاعها ولا اسهل .......مش عارفه رأ ى الدين فىموضوع افتح موقع الفتاوى ولا اعظم ........لتجهيز عملى اكتب اسم الموضوع و هوب اخدلى فكرة من هنا و فكرة من هناك و خلاص اجهز تقريرى و مافيش مثيلى .....لدرجه اى تليفون يتصل بى من النمرة بتاعته ادخل اجيب اسم اللى اتكلم و مكانه فيه و يا أرد يا ماأردش ...........انا بقيت اسيرة النت و مدمنة له بشراهه لو الكهربا قطعت اقعد مش على بعضى و ايدى بتاكلنى...............حاولت اتخلص منه بس بارجع اشد مما قبل باحس انه بياخدنى من واجباتى الأسريه و المنزليه.......لدرجه انى بادعى ربنا يبعدنى عنه شويه ....بس دى الحاجه اللى باحبها بجد باجد لنفسى مبررات ....فيه عتدى اشياء اهم محتاجه تتعمل و مؤجله و اليوم بيضيع ........انا مدمنة و مش عارفه اتعالج ازاى و اللى زاد و غطى عالم البلوجرز .....ده باين على حأشوف ايام اغمق من اللى فاتت

احلامنا الحلوة

2007-01-10T15:35:00.000-08:00

طول ما احنا اطفال لنا احلامنا الخياليه و فى سن الشباب بتبقى احلامنا اكثر واقعيه و تتحول لطموح و امجاد شخصية يعنى احلام صحيح بس ممكن تتحقق و لكن احيان كتير الواحد بيضحى بجزء من احلامه و طموحه الشخصى فى سبيل معانى اهم و ابقى و ملحه اكثر -تختلف الأهميه من شخص لأخر - زى الأستقرار و تكوين اسرة وبما ان العمر بيجرى -و خاصة للمرأة بيجرى اسرع شويه- لازم تترتب الأحلام و الطموحات تبعا لأولويات كل مرحله يعنى ايه اللى اقدر احققه و ايه اللى اقدر اؤجله و ايه اللى مش حأقدر اعمله ...طبعا لو حلمك و حلم شريك حياتك واحد يبقى ده الحل المثالى و يبقى بختك من السما لكن لو حصل تعارض هنا المشكله ......طبعا الحلم و الطموح مش بيموت و فيه ناس اللى مش بتقدر تحقق احلامها يا اما ترضى بالواقع و تحاول تحقق احلامها فى اولادها وتحول الطموح الشخصى لطموح عائلى و ده بيجى على هيئه ضغوط على الأولاد و ساعات بتنجح و ساعات كتير بتفشل ...او ناس مش بتقدر تستحمل كتير و تفضل تجرى ورا حلمها راغبه فى الحصول على كل شئ و فى النهايه لازم حا توصل للحظة الأختيار اما الطموح الشخصى او الأسرة .....يا اما ناس تكتئب و هى لا تستطيع عمل الموازنه المطلوبه ......
السؤال هل لازم نتنازل عن احلامنا الشخصيه فى سبيل اسرة مستقرة و اولاد اصحاء جسمانيا و نفسيا لكن المعادله الصعبه فى الوصول لحالة الرضا و هى مغامرة لا شك ....ولا طموحاتنا و احلامنا الشخصيه مهمه ومحاوله تحقيقها هى فى الواقع استمرار لنجاح الأسرة ككل حتى لو اتصف الشخص بالأنانيه قليلا و اخذ من وقت و حاجة اسرته اليه و يااما تعدى الأمور على خير او يتغلب فريق على الأخر و هى مغامرة ثانيه ...ولا الواحد من البدايه يعيش لنفسه فقط و لو وجد من يتفق طموحه و حلمه معه يكمل و ان لم يجد يبقى قلته احسن و ان كانت مغامرة ثالثه .......
اعتقد ان اجمل ما فى الحياة هو المغامرة ...........

كتم الغنا يموت

2006-12-11T11:23:00.000-08:00

يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك
عجبي !!!
=========================
يمكن انا عملت البلوج ده علشان ما اموتش من كتم ما بداخلى .........قول الشكوى و الحكايه حتى و لو فى فراغ النت نوع من الفضفضه المطلوبة ......حأقول و اقول علشان ما اطقش بدرى بدرى