Thursday, January 11, 2007

أنا مدمنة

ارتحت جدا لما اعترفت لنفسى انى اصبحت مدمنة انترنت فعلا انا مدمنة و اتأكدت من اكتر من اختبار ,,,,اول ما اقوم الصبح افتح عينى على النت اقرأ الجرايد و المواقع الألكترونيه اللى مسجلاها عندى ثم على الكام منتدى اللى مسجله فيهم اشوف مين رد و مين ما ردش و فلان كتب ولا لأ و فلانه رجعت ولا لسه ......و لما الأولاد يصحوا نبتدى الكر و الفر اضع الشاى يجهز و انا على النت ...حلوا المسأله الفلانيه على ما ابص بصه ....اتكلم فى التليفون و انا باقرأ الموقع الفلانى ....خلصنا ياماما حلوا الأمتحان اللى بعده .....بس انتى لسه ما صححتيش اللى قبله مش مشكله ابقى اصحح كلهم مع بعض وطبعا مش بيحصل ..كل ده و انا مش هنا و لسه باقرأ و اقرأ ...اضع الأكل على النار و ادخل على النت حتى نوم الظهيره ضحيت بيه علشان عيون النت و البيت بيبقى هس هس ......واحده تكلمنى عن اشاعة ما تعرفى عنها حاجه ادخل اجيب اصل الموضوع و فصله ....درجات الحرارة و نلبس ايه بكرة شرحه من على النت .......مشتاقه لأغانى الذكريات شبيك لبيك افتح و اسمع الأغانى و اجيب كلماتها كمان من الموقع الفلانى و استرجع الموسيقى و الألحان اللى كنت باعشقها ......و لو كلمه فى الفرنساوى اللى مش فاكره منه حاجه و مش شايفاها فى ورق مراجعة الأولاد افتح موقع تعلم الفرنسيه اشوفها و اشوف شرحها و تمارين عليها كمان و اقوم و كأنى خريجه السكاركير و بالنطق كمان....مش فاهمين دورة حياة البلهارسيا اكتب الكلمه و بسرعه الاقى الشرح بالصور و الألوان ولا اروع .........اعمل اكلة ايه النهارده افتح على موقع طبيخ اجيب الوصفه بالشكل النهائى بتاعها ولا اسهل .......مش عارفه رأ ى الدين فىموضوع افتح موقع الفتاوى ولا اعظم ........لتجهيز عملى اكتب اسم الموضوع و هوب اخدلى فكرة من هنا و فكرة من هناك و خلاص اجهز تقريرى و مافيش مثيلى .....لدرجه اى تليفون يتصل بى من النمرة بتاعته ادخل اجيب اسم اللى اتكلم و مكانه فيه و يا أرد يا ماأردش ...........انا بقيت اسيرة النت و مدمنة له بشراهه لو الكهربا قطعت اقعد مش على بعضى و ايدى بتاكلنى...............حاولت اتخلص منه بس بارجع اشد مما قبل باحس انه بياخدنى من واجباتى الأسريه و المنزليه.......لدرجه انى بادعى ربنا يبعدنى عنه شويه ....بس دى الحاجه اللى باحبها بجد باجد لنفسى مبررات ....فيه عتدى اشياء اهم محتاجه تتعمل و مؤجله و اليوم بيضيع ........انا مدمنة و مش عارفه اتعالج ازاى و اللى زاد و غطى عالم البلوجرز .....ده باين على حأشوف ايام اغمق من اللى فاتت

2 comments:

Yasser_best said...

إدمانك جميل ومفيد

لكن من المهم أن تتحكمي فيه.. لا أن يسيطر عليك

العالم الآن على بعد ضغطة زر من أصابع يديك..غير أن الأهم هو أن يكون العالم بين يديك لا أن تصبحي رهينة هذا العالم

أما التدوين.. فإن ما تضيفينه من كتابات أو تعليقات قد يضيء الطريق ولو لإنسان واحد على الأقل.. وهذا هو الخبر السار

ثقي بأن لكلماتك معنى وأهمية

ثقي تماماً في ذلك

مش فاهمه said...

Yasser_best
يمكن ما شجعنى اكثر هو تعليقك
لأنى حسيت ان ممكن حد يقرأ ما اكتب
شكرا لك ......