Friday, December 5, 2008

ناولينى الشوز ....يا اختشى

فى عملى فيه موظفين معاهم دبلومات و متوسطى الشهادات و اندهشت جدا و احنا بنتوضى مرة ان كلهن تقريبا بيقولوا على الجزمة ولا مؤاخذه شوز
واضح ان موضوع تطعيم المحادثات بكلمات انجليزية موضه وعلى كل المستويات ليه التكلف و التحدث بالأنجليزيه بالعافيه علشان نبين مدى ثقافتنا و مستوانا الأجتماعى بالرغم من ان معظم الدول المحترمه يصر مواطنيها على التحدث بلغاتهم رسميا و شعبيا و ده اللى خلانا نصر نعلم اطفالنا عدة لغات فى بدايه حياتهم مع اهمال اللغه العربيه و ده اللى بيسبب لهم الأرتباك و عدم القدره على التعبير عن ارائهم بطلاقه و حريه
اقولكم اللى فكرنى بالموضوع ده ختام مهرجان القاهرة السينمائى و كل نجم و نجمه مصريه اصر يصر اصرارا انه يقدم الفائزين و الأفلام باللغه الأنجليزيه اللى ظهر جدا مدى تواضع مستواهم فيها طيب و كان ليه من اصله
اللى احترمته جدا جدا خالد صالح اللى الوحيد اللى قدم الجائزة باللغه العربيه و اللى قدرته جدا بعد الحركه دى

5 comments:

FrUiTa said...

مرحبا
كلامك صحيح .. لا أدري هل هي موضه ولا نوع من الرقي ولا ايه بالضبط ان نتكلم نص عربي ونص انجليزي واحيانا جمله عربي ونص كلمه انجليزي
المصيبه فعلا عندما يكون المتحدث لا يجيد الانجليزيه ولكنه يصر على استخدام بعض الكلمات الانجليزيه في جمل محدده ومواضع معينه

أحيانا تكون المبالغة في التحدث بهذه الطريقه مزعج جدا .. هل نحن بصدد الغاء لغتنا؟ هل لغتنا اقل شأنا من اللغات الأخرى .. أنا مع تعدد اللغات ولكني ضد بهدلة اللغه وتحريفها

تحياتي لك

مش فاهمه said...

عزيزتى Fruita
الموضوع المزعج اكتر هو اجبار الطفال دون سن المدرسه للتحدث بالأنجليزيه او الفرنسيه هذا ما يحدث من الطبقه الهاى كلاس كما تسمى مع وجود شغالات اجانب و كل ام تصدر اوامرها بالأنجليزيه ولو سالتى ليه الجواب علشان اما يعملوا انترفيو فى مدارس انترناشيونال و الطفل من دول معذب مش عارف يتكلم لغه بلده ولا اللغه المجبر على تعلمها ....و الحقيقه ان اطباء علم النفس اشاروا ان الطفل الذى لا يتمكن من لغته الأم لا يستطيع التعبير بوضوح و تركيز حتى و لو تعلم عشرات اللغات
المثير للدهشه و للضحك بقه لما تلاقى الطبقه تحت المتوسطه و هى بتعلم اولادها - بس طبعا مش بنفس مستوى الهاى كلاس - الأنجليزيه و العجيب لنفس السبب بس مش علشان مدارس انترناشيونا ل لأ علشان المدارس الخاصه و بيكون التعليم مش بجمل و اوامر ل بكلمات ى قول لعمو عربيه يعنى ايه بالأنجليزى و على طريقه الأغانى الفرانكو اراب زى بحر يعنى سى و أرنب يعنى رابيت و كده
اما الطبقه المتوسطه اللى ممكن تكون عارفه اهميه التعبير بالعربيه و عندها مخزون جيد ثقافى عربى و اتعلمت زمان فى المدارس العربى هى اللى متلخبطه و متشحططه بس ده موضوع تانى ينفع مدونه لوحده

قبل الطوفان said...

الإكثار من الجمل والتعليقات بلغة أجنبية من دون مبرر، نوع من الاستعراض الفج الذي ينم عن ضعف في الفكر وانسحاق أمام لغة وثقافة نتصور أنها أقوى، أو نتوهم أننا حين نتحدث بها نصبح مثلهم!

نوع من التماهي، مثل الذين يظنون أن مطاعم الوجبات السريعة تمنحهم الجنسية الأمريكية
:)

مش فاهمه said...

العزيز ياسر ثابت
فعلا انا اعتقد ان كثرة استخدام كلمات اجنبيه ينم عن عدم ثقه و شعور بالدونيه بلا داعى وارى ايضا ان محاولة التحدث بالأنجليزيه - حين الحاجه الملحه- لا يستلزم ابدا لكنه جيده او ما يسمونها اكسنت أعتقد انه كافى ان توضح ما تقصده دون اللجوء الى التحدث بالأنجليزيه بلكنة اهلها حين يجيئنا ضيف و يحاول التحدث بالعربيه المكسرة نكون فى غايه السعاده انه حاول لكن التكلف و اصرار البعض على اكتساب اللكنه و دفع الشئ الفلانى فى المدارس كى يتحدث الأولاد بلكنه جيده و فى النهايه طلب الوظيفه الذى يتطلب التحدث بلكنة طليقه لماذا لا اجدد مبرر سوى شعور بالأنسحاق و اهتزاز للثقه بالنفس
نورت البلوج

سواح في ملك اللــــــــــــــــــه- said...

ده يثبت اننا بلا هويه وبنتمسح في اي بلد