Saturday, January 10, 2009

شيزوفرينيا

من ساعة موضوع غزة و اللى بيحصل فيها و موقف مصر المتخاذل من اللى بيحصل و انا ضميرى بيوجعنى جدا و عندى احساس فظيع بالذنب و كل شويه و التانيه تطلع العيبه من بقى فى حق الصهاينه و من والاهم من حكامنا العرب لا استثنى منهم احدا .المشكله اللى بتواجهنى هى مصارحة بناتى بحقيقه موقفنا كمصريين مع اللى بيحصل و بيشوفوه فى غزة مع الأخذ فى الأعتبار و احنا بنذاكر مواد اجتماعيه و تاريخ انى ياحاول اعظم فى قدرات مصر التاريخيه و الحغرافيه و ان اللى قضى على الصليبيين و التتار جيوش المسلمين و على رأسهم الجنود المصريين اللى الرسول اخبرنا بانهم خير اجناد الأرض و طبعا مافيش مانع من جعلهم يفخروا بمصريتهم و بان مصر هى امى و نيلها هى دمى لكن للأسف خبت جدا و احترت و انا مش عارفه اجاوب على تساؤلاتهم ليه مش بنساعدهم ليه ساهمنا فى حصارهم و ليه كلنا كمسلمين مش بنقف معاهم .......ولما فشلت و خفت عليهم احسن واحده فيهم تطلع اسرار البيت من شتيمه و حنق و غضب على اللى بيحصل مننا فى اخواننا فى موضوع تعبير زى الاء كده البنت اللى شتمت فى بوش و الريس .................قررت نمتنع عن مشاهدة قناة الجزيره و المنار و صحف المعارضه و نكتفى بمشاهدة نشرة اخبار قناة النيل للأخبار و مطالعة الأهرام و اسامه سرايا و احمد موسى و سماع اغنيات المصريين اهمه و نرسل كام جنيه لنقابة الأطباء و نتغطى كويس و ننام

9 comments:

FrUiTa said...

عزيزتي "مش فاهمه" انا زيك مش فاهمه احنا في وضع غريب ومريب .. عارفه انا حاسه بإيه؟؟ حاسه ان احنا في تمثلية كبيرة ودي حقيقة .. احنا الشعوب مضحوك علينا عندنا طاقات كبيرة بس حكوماتنا معجزانا

اللي بيحصل في غزة دا معروف انه كان حايحصل، ومعروفه بردو ردود الفعل العالمية .. يعني الشعوب في كل مكان ثايرة وحزينه عشان الناس الأبرياء اللي مالهومش ذنب ناس عايشين في النار واحنا مش قادرين غير اننا نتبرع بالدم وبالفلوس لعل وعسى مساعداتنا توصلهم ويستفيدوا منها

بس المشكلة الكبيرة فعلا هي السياسة الحقيرة المتبعة في الوطن العربي .. يعني من اول النزاع الفلسطيني الفلسطيني اللي بيكسف فعلا لنشفان دماغ جماعة حماس لدور الدول العربية .. وهنا مش حاقول مخيب لأننا لو فكرنا بموضوعيه حاتعمل ايه الدول العربية؟ حاتدخل في حرب؟؟ حطوا مصر في وش المدفع وناس تانيين زي سوريا والحاج نصرالله بيحاولوا على قد ما يقدروا انهم يشوهوا صورة مصر.. طيب اللي يقدر يعمل حاجه يعملها.. ابو الغيط قال احنا لا وضعنا ولا امكانياتنا تسمح اننا ندخل حرب مع اسرائيل.. ودي حقيقة .. ليه سوريا اللي عامله نفسها شهمه أوي مأمنه كويس أوي كدا على الجولان؟ ليه نصرالله مستخبي وساكت وعمال يتحفنا بكلامه كل شويه وشعاراته الفتاكه اللي مش حانستفيد منها حاجه؟ ليه خالد مشعل وزعماء قياداته اللي الله أعلم هما مواقعهم ايه بالظبط عمالين يبعتوا في تسجيلات للفضائيات وسايبين الغلابه يموتوا عشان سياساتهم الغلط؟

الكل متفق ان الوضع اللي احنا فيه خطأ، بس احنا جوا دوامه والحكاية مكلكعه من كل الإتجهات ومحدش حايعمل حاجه لأن محدش يإيده يعمل حاجه

سهل أوي اننا نتكلم لكن الواقع أصعب بكتير

أنا من رأيي عمرنا ما حانعرف نحل مشكلتنا مع اسرائيل طول ما أوضاعنا في أوطانا بالشكل دا .. وطول ما المواطن العربي مقهور ومكتوم على نفسه .. وطول مافي جماعات بتتكلم بالشعارات الكدابه وهما في الآخر مش بيفكروا غير في مصالحهم ..

اللي مضيعنا هو فساد أخلاقنا وتعليمنا وكلامنا ومبادئنا .. دا احنا مطلوب مننا ان احنا نتولد من جديد

اتكلمت كتير ولسه في كلام كتير بس اكتفي بهذا القدر لأني فعلا زعلانه

تحياتي لك

ذو النون المصري said...

فين الجديد
من زمان مكتبتيش حاجه جديده ليه؟
تحياتي

شفت المصيبة دي؟ said...

شفت المصيبة اللي في الوصلة دي؟
http://massai.ahram.org.eg/97/2010/03/16/31/4002.aspx

الراجل من اشهر قراء الأذاعة و التليفزيون و عنده 70 سنة و نفسيته مدمرة و ممكن يموت فيها

سواح في ملك اللــــــــــــــــــه- said...

مش فاهمه سلام عليكم شفتي الواد المهدي المنتظر بتاع الفيوم بيقول عمه المسيخ الدجال ماشاء الله قبضوا عليه والنيابه افرجت عنه الظاهر خافوا لايجيب باقي عيلته اصله من عيله ياجوج وماجوج

esraa said...

السلام عليكم يا اختى الكريمة
عمالين نعيب فى الحكومة و العيب فينا من انا مش مع الحكومة ولا مع الاحزاب ان كانت معارضة ولا غيرها الحكومة بالاحزاب كام من عدد سكان مصر احنا اللى بايدينا كل حاجة بس للأسف احنا بنحب السكوت و السكون و بلاش نعلق مشاكل امتنا على حد غيرنا........
و ارجو ان كلامى ده ما يحسسكيش انى ضد كلامك انا حاسة بيكى جدا و ياما جالى الاحساس ده بس لو بصيتى شوية كده هتلاقى ان كل حاجة بتحصلنا احنا السبب الرئيسى فيها

سواح في ملك اللــــــــــــــــــه- said...

كل عاموانتم بخير

مش فاهمه said...

ذو النون و م.ج. و شوفت المصيبة دى و اسراء و سواح فى ملك الله نورتونى و حسستونى ان فيه حد مهتم ربنا يبارك لكم

الحصان الأسود said...

اذا كنتي مش فاهمه اسألي الناس الفاهمه

الموقف مش متخاذل

الموضوع ان اسرائيل منى عينها اننا نفتح المعابر و الحدود مع غزة

يزيدوا في الضرب يخللوا كل غزة عندنا في سينا و يقفلوا المعابر وراهم

و يبقى خلصوا من مشكلة الفلسطينيين

و بقت مشكلتنا احنا

الحصان الأسود said...

وتقبلي تحياتي