Friday, April 4, 2008

الأحلام المؤجله

عندى يوم فى الأسبوع باذهب فيه الى مدينة 6 اكتوبر لألقاء محاضرة هناك و فى هذا اليوم باركب عربيات 6 اكتوبر من موقف اسكندريه فى الهرم . و فى كل اسبوع و انا داخله الموقف يسألنى احد السائقين اسكندريه يا مدام و فى مره ابقى على وشك اقوله ايوه و بعدين اتراجع و انا عارفه ان فيه ناس مستنيانى و انى لازم ارجع فى وقت معين علشان اجهز الغدا للأسره و ان عندى التزامات اسريه و مهنيه و عائليه لازم اقوم بها و افضل طول الطريق افكر ايه اللى ممكن يحصل لو ركبت عربيه اسكندريه و قضيت عدة ساعات و بعدين اخد بعضى و ارجع عادى بعد ما اشم هوا البحر و اكل اكلة سمك معتبره و خلاص
بتتكرر الأحلام دى لما ينزل فيلم جديد مثلا فى السينما و ابقى نفسى انشل نفسى من المشاغل و الهموم و اقطع تذكره ان شاالله من 10 لواحده زى اللى بيهربوا من المدرسه و الحبيبه الصغار و افضل افكر فى الموضوع و اخد و ادى مع نفسى لحد ما الفيلم يخلص من السينما و اشوفه على الكمبيوتر بعد كده .
و هكذا بتترواح احلامى المؤجله من اول مشوار اسكندريه لحد انى مثلا املا البانيو و اغطس فيه ساعه واحده بس مرورا بموضوع السينما
مش عارفه امتى حألاقى وقت و امتى حااتشجع و امتى حأرمى كل المشاغل و المسئوليات و الهموم و اعمل حاجه لنفسى انا

7 comments:

اجندا حمرا said...

صباح الخير عزيزتي

بخصوص المشاغل و موضوع السينيما انا برضه كده لما بينزل فيلم حلو بفضل اقول لنفسي حدخله حدخله و افضل كده لحد مالفيلم يتشال من السينيمات
الموضوع بتهيئلي عايز تنظيم وقت مش اكتر حبه وقت حتي و لو صغير لنفسك انتي و بس تستمتعي فيه بالحاجه اللي انتي بتحبيها و عايزاها

اول مره في مدونتك و انشاء الله حكررها كتير

تحياتي ليكي و ربنا يوفقك في شغلك و حياتك الاسريه

مش فاهمه said...

عزيزتى اجنده حمرا شاكرة ليكى مشاركتك القيمه
معاكى حق الموضوع محتاج شوية تنظيم وقت
خطوة عزيزه و منتظراكى دوما

زمان الوصل said...

عندى تعليق سأؤجّله -حتى التعليق مؤجّل- للمساء فقط بسبب حالة صداع لعينه
:( انتظرونا

مش فاهمه said...

يااااااااااااااااااااااه أخيرا شرفتينى و الله يا زمان الوصل المهم فى انتظار مشاركتك و اللى جايز تكون السبب انى ارجع اكتب تانى فى المكان المهجور ده

زمان الوصل said...

ما أنا جيت مرّه قبل كده و خدت انطباع أنّك توقّفتى عن الكتابه !! و بعدين امبارح قلت آجى أرمى نظره كده لقيتك الشبابيك مفتوحه و المكان منوّر فقلت آجى بقى :)
التدوينه دى فكّرتنى بتدوينه كتبتها زمان اسمها "أحلى الأوقات"
http://zamanalwasl.blogspot.com/2006/05/blog-post.html
عن موقف من الفيلم شبه بالظبط اللىّ بتحكى عنّه !! وقتها استغربت جدّا موقف السيّدات حولى و كلّهن تقريبا متزوّجات يعنى بافترض يكون لهم نفس الرغبه فى الحصول على إجازه للترويح عن النفس أو ممارسة شئ هى نفسها فيه و ليس ممارسة الأشياء التى تتاح لها بحكم كونها زوجه و أم من غير ما تتفق مع رغباتها بالضروره

الغريب أن معظم الأحلام المؤجّله هى أحلام بسيطه جدّا و ممكنه و قابله للتحقّق طيب إيه اللى بيمنعنا عن تنفيذها :( و أمّا الأحلام البسيطه دى تفضل تتأجّل طيب ماذا عن الأحلام الأكثر تعقيدا !!

وبعدين أمّا انتى ليكى فى السينما ليه مش بتقولى يا بنتى و إحنا نروح سوا و اختارى الحفله اللىّ تناسبك !!

مش فاهمه said...

عزيزتى زمان الوصل
انا فعلا توقفت عن الكتابه لما ما لقتش حد بيقرأ اما بخصوص قولك انها أحلام بسيطه فعلا هى
احلام بسيطه و مزيتها انها مؤجله لأنها لو اتنفذت مش حاتبقى احلام ......كون يكون لك حلم خاص ده فى حد ذاته متعه و عدم تحقيقه او تأجيله اعتقد و الله اعلم حيله نفسيه تعطيكى احساس بالتضحيه و كده
اما بخصوص الأحلام الكبيره دى قولى عليها يا رحمن يا رحيم لو تابعتى هنا

http://moshfahma.blogspot.com/2007/01/blog-post.html

حاتعرفى ان الأحلام الكبيره خلاص لا العمر الباقى ولا الجو العام و لا الناس تساعدك على اى حاجه
بخصوص السينما موافقه جدا بس انتى عارفه خلافتنا بالذات فى موضوع السينما من اول عبله كامل لحد ميريل استريب ...........
للأسف مافيش ورد هنا

شرفتينى بجد و عايزاكى تنتشرى كده فى المكان و اعملى لى حس بدل السقعه دى

زمان الوصل said...

لا لا لا الأحلام البسيطه أمّا تتحقّق هتلاقى فيه أحلام جديده جت !!
فاكره مسرحية "محمد صبحى" اللىّ كان بيسأل فيها عن الفرق بين الإنسان و باقى الكائنات؟
أظن الفرق اللىّ ممكن نقوله بكل ثقه أن الإنسان كائن حالم .. يعنى الحلم شكله طبيعه إنسانيه كل ما تحققى حلم يتولد حلم جديد و هكذا ..
يعنى لو بتحلمى تروحى "اسكندريه" خطف و حقّقتى الحلم ده هتبطّلى تحلمى نفس الحلم .. بس هتحلمى بيه بشكل مختلف كل مرّه !! و نفس الشئ بالنسبه للسينما :) و مفيش أى داعى للتضحيه حتى بالأحلام البسيطه من أجل الآخرين لأنّهم لن يستفيدوا شئ من هذه التضحيه و لن يضيرهم فى شئ أن تحققى لنفسك متع بسيطه كده

مش عاوزه أتكلّم عن الأحلام الكبيره دلوقت :) بس خلّينا نتكلّم عن أحدها و هو اتّفاقنا على فيلم نروحه سوا :) يعنى نشوف فيلم وسط .. قصدى حل وسط لا فيه "ميريل ستريب" ولا "عبله كامل" .. أنا بس صعبان علىّ تفتقدى متعة الفرجه على "ميريل" بس انتى اللىّ خسرانه و ياما أكتر الأفلام اللىّ تحقق طلبنا :)

هانتشر فى المكان عشان فيه حاجات كتيره عاوزه أبص عليها :)