Monday, December 15, 2008

عالم جزم جزم جزم

عجبتنى قوى حركة ضرب بوش بالجزمه و دخلت دماغى جدا - الحركه طبعا مش الجزمه - و تمنيت لو احدف كل واحد ظالم او فاجر او كاذب او مش عاجبنى أداؤه او مش بيقوم بواجبه او بيشتغلنا او بيستغلنا .................يااااااااااااااه ده انا حأجيب جزم تكفيهم منين بصراحه الكتير يستاهلوا ينضربوا بالجزمه

11 comments:

زمان الوصل said...

أنا شخصيا ولا عجبتنى الحركه ولا حاجه .. بس أهى حركه تخلّى الناس تنبسط و تهيّص و تحس بالنشوه على رأى "منى الشاذلى" ..

مش فاهمه said...

تخيلى لما الناس تجمع على شخص انه متخلف و مهزوز و بيتحكم فى الكرة الأرضيه كلها و جيش جيوش و القى بهم فىالتهلكه و موت له يجى مليون شهيد و سياسته خرقاء حمقاء و باعتراف مراته نفسها انها بتتمنى انه يفضل نايم على طوووووووووول لأنه لما بيفوق بيعمل مصيبه و كلده و بكل بجاحه رايح العراق يقول لهم سورى يا جماعه الحرب نتيجه خطأ استخباراتى يبقى اسمحى لى يستاهل ايه ..............دى الجزمه شويه عليه
تخيلى بقه ان حواليكى نوعيات كتير من البشر كلها تحمل صفات الحمق و الرعونه و الفجر و الظلم و الجبروت و لا تملكين حيالهم الا اضعف الأيمان مش بذمتك الجزم تبقى مفيده جدا فى الحاله دى انا شخصيا فى دماغى اكتر من واحد يستحق الضرب يالجزم ممكن اقولك اساميهم من ضمنهم مدير مدرسه البنات ولا اقولك وزير التعليم بحاله اللى ملخبط لنا المناهج و مدرب البنات فى النادى و البواب اللى عندنا اللى سايق العوج علينا و اللى حط قانون المرور الجديد و شوية شخصيات افتراضيه نتيه و ....الباقى بقه فى التليفون علشان ما حدش يسمع :)

زمان الوصل said...

أنا لم أتحدّث فيما يستحقه "بوش" و ما إذا كانت الجزمه كتير ولا شويّه عليه !!
أنا أتحدّث فى صنع بطل من ورق من الأخ "منتظر" و إعطاء عمليات التنفيس هذه أكثر ممّا تستحق و أرى هذا شيئا شديد الخطوره .. لا أريد الاستسلام لحالة النشوه المرعبه التى سادت العالم العربى لأنّها تدفع البعض لتصوّر أنّنا حققنا انتصار ما بينما الحقيقه أن شيئا لم و لن يتغير بالعكس ظننا أننا فعلنا حاجه سيدفع لمزيد و مزيد من التراخى ..
قرأتى طبعا عن عرض أحدهم دفع 100 ألف دولار لشراء الحذاء الذهبى !! بذمّتك مش حاجه تحرق الدم ..
نكمّل على التليفون :)

مش فاهمه said...

جميل اذن اتفقنا ان بوش يستحق ضرب الجزمه فعلا بل هو يستحق ماهو اكثر اتفقنا و انا كمان باتفق معاكى فى ان جعل منتظر بطل عربى ثورى فيه الكثير من المبالغه لأنه ببساطه الناس ارتاحت ان واحد عبر عن اللى نفسهم يعملوه فى بوش او غيره - و اتكى على غيره دى - و خلاص و كل واحد يروح ينام و يشخر ان فيه حد عمل اللى عليهم .....زى ما الناس البسيطه اللى بتفرح لما الأهلى يغلب و تنام و كانها هى اللى غلبت و انتصرت على الذل و البطاله و ضنك المعيشه
لكن اللى مش متفقه معاكى فيه بقه هو التقليل من اللى عمله منتظر راجل لم يملك سوى الحذاء و رافض لوجود بوش و الأحتلال اأمريكى و لم يتحمل استهانه بوش بالعراقيين و اعتذاره بكل بجاحه فأهانه اهانه بالغه فى الثقافه العربيه الا و هى حدفه بالجزمه القديمه ......كون بقه الناس عملت منه بطل او حد زايد على الموقف دد دى مش غلطته هو ......كل التحيه له و كل العار كله لنا

زمان الوصل said...

أوّلا فيه مشكله فى تصوّر الأمر على أن كلّنا عاوزين نضرب "بوش" أو غيره بالحذاء !! اللىّ إحنا محتاجينه فعلا أعقد من هذا بكثير ولا دخل للأحذيه فيه !! كمان كما قلت فى التعليق اللىّ فات فيه خطوره فى فكرة "واخد عمل اللىّ نفسنا نعمله و فشّ غلّنا" لأنّه بيكون نتيجته الأنتخه على حسّ ده و إحنا أصلا مش ناقصين أنتخه .. ده ماكانش اللىّ علينا نعمله عشان أمّا واحد يعمله نعطى أنفسنا عذر للراحه على حس الموقف !!

الصحفى مش دوره يضرب أحد بالحذاء تعبيرا عن رفضه أو استنكاره !! هل تعتقد أن لو صحفى مصرى ضرب شخصيه مصريه عامّه بالحذاء مهما كان الغضب الشعبى منها سيكون هذا مقبولا بأى شكل؟ هل سيكون كافيا أو مريحا للبعض عوضا عن محاكمه عادله أو حساب حقيقى للمخطئ؟ المشكله إن ردود الفعل العاطفيه بقت هى لغتنا و الأدهى إنّنا بنوجّه رساله ليست مفهومه إلاّ لنا و ليس للمتلقّى يعنى كأنّنا بنكلّم روحنا مش بنكلّم اللىّ إحنا ساخطين عليهم .. زى بالظبط اللىّ يعمل كتاب لتعريف الغرب بسماحة الإسلام و يكتبه باللغه العربيه .. مفيش أى حاجه منّه هتوصل المعنيين ..

FrUiTa said...

السلام عليكم
أنا معاكي "مش فاهمه" ان بوش يستاهل الضرب بالكرباج كمان .. بس أن ضد التصرف اللا أخلاقي العقيم اللي عمله الصحفي

يعني بدل التصرف الجزمة دي كان ممكن يوجه نقد مثلا .. يسأله سؤال يحرجه .. مش يحدفه بالجزمة

ليه احنا دايما بنحب نقلل من أخلاقنا ونبان أغبياء كدا لكل الناس .. والمشكلة ان الناس بتفرح أوي وتدي للموضوع قيمه أكبر من حجمه زي ما قالت زمان الوصل .. مش دا اللي مطلوب

المطلوب اننا نعمل حاجه مفيده بجد .. محترمه بجد

وبعدين تخيلي لو كل واحد عبر عن غضبه بجزمه شوفي كام واحد في الكون مش حايضرب بالجزمة .. أنا أعتقد أن كل رؤساءالدول العربية حيموتوا من الضرب بالجزم

أنا من رأيي انه موقف مخل فعلا وعقيم فعلا .. وياريت الناس ماتديش الموضوع أكبر من حجمه لأنه ولا حاجه لأنه ماقدمش أي حاجه

تحياتي ليكي

قلم جاف said...

في العام 2003 وعلى منتدى لأحد المواقع الإخبارية المصرية القديمة نسبياً دار النقاش وبعنف عن غزو العراق المحتمل في ذلك الوقت.. وفوجئنا ببعض "الليبراليين" يدافع وبشدة عن الغزو البوشي للعراق بسبب وبدون معتبراً إياه وسيلة لتحرير العراق من الظلم والقهر والطغيان و...و... .

هؤلاء ، والصحفيون الذين أيدوا غزو العراق من البداية .. هم من يستحقون فعلاً الرمي بالجزمة .. وليس بوش!

فيما عدا ذلك أتفق على أن العالم العربي صنع شيئاً من لا شيء في مسألة "منتظر"..

مش فاهمه said...

العزيزة فروتا
منورة البلوج و الله ......موضوع بدل الجزمه كان وجه له نقد او تكلم فى صميم عمله ما افتكرش بفايده ماهنا هنا عندنا ما شاء الله اقوى الرامج الحواريه و بنجيب الورا و المسئولين و نحرجهم و نخلى وشهم فى الطين و فى النهايه ولا حاجه بتتغير ..اللى عمله الصحفى رد فعل تلقائى عفوى استفزه كلام بوش فقام معاه بالواجب كون بقه نقدر هذا الفعل من عدمه كل حسب رؤيته و ماتنسيش ان حرية التعبير مكفوله لجميع ...........بس فى امريكا

مش فاهمه said...

العزيز قلم جاف
بجد مشاركتك هنا للمرة الأولى مفاجأه لى طالما قرأت لك فى مدونتك الكثير و من قبلها فى عالم المنتديات الكثير
انا معاك ان من يستحق ضرب الأحذيه هو من سمح للقوات الامريكيه باحتلال العراق و من قبلها من سمح لصدام باستباحه العراق و الكثيرين مدانون على الأقل بوش بيدور على مصلحته و مصلحة بلاده فى وضع يده على مواطن الثروات فى العالم لكن احنا حجتنا ايه
نورتنا و خلص الكلام

زمان الوصل said...

معلش انا بس عندى تحفّظ جامد جدّا على الزج بموضوع حريّة التعبير فى الموقف ده !! لو دى حريّة تعبير فعلا لن يتقبّل هذه الحريه كثير من المهللين لها لو مورست ضدّهم و بصراحه فيه خطوره شديده فى انتهاك مصطلح "حرية التعبير" فى حادث كهذا ..

مش فاهمه said...

عزيزتى زمان الوصل
هو انا قلت حرية تعبير .....مش متأكده بس لو كنت قلت يبقى اقصد واحد عبر عن رايه و بحريه وفرتها له الحضارة الأمريكيه المحتله زى ما قبل كده طالب حدف بوش بالطماطم و قبل كده واحد حدف بلير بالبيض ده حتى فيه جائزة امريكيه تسمى حذاء فى الفم و فاز بها رامسفيلد بجدارة يعنى ربط الأهانه بالحذاء مافيهاش حاجه يعنى واحد انفعل و قلع جزمته و حدف بها واحد يستاهل كده و اكتر يبقى مافيش مشكله ان شاء الله :)