Friday, July 18, 2008

بكلمة منك

أغنية شيرين الجديده بكلمة منك ...لمستنى جدا لحنها و كلماتها و فكرتها خلتنى اتسائل هل فعلا ممكن بكلمة واحده من الحبيب نتطمن و تشيل الهم و تخلى الواحد يعمل حاجات مش بيحبها كل ده بكلمه من الحبيب ...... الأفعال مهمه جدا لكن الكلام فى رأيي اهم
الأفعال هى الواجبات و المسئوليات لكن الكلام محتاج قدرة و تدفق و استمراريه فى المشاعر و كرم فى التعبير عنها
ليه الحبيب فى اول الحب بيتكلم كتير و بيهتم و بيطمن و بيرسم بالكلمات المستقبل و ليه الحبيبه فى اول الحب بتسمع اكتر و بتتشد للكلام و الغزل و الحب و الوعود و بتصدقها كلها و ممكن تنسى شروط كانت بتضعها على فارس الأحلام و بتنسى احلامها و طموحاتها علشان كلام الحبيب اللى بيطمن و يديها الأمان و بعد كده لما الحب بيتحول لزواج بيخلص الكلام و يتحول المتكلم الى مستمع دائم و المستمع الى متكلم دائم و كأن ده قانون غير مكتوب اتكلم انت قبل الجواز و اسكت خالص بعده و انتى اسمعينى و صدقينى و اطمنى و بعد الجواز اتكلمى و انا ولا هنا ........انا عاذراك ايها الرجل و الزوج الدنيا فعلا بقت قاسيه و الحياة صعبه لكن بجد الكلام مهم ليه البخل بكلمه و خصوصا للمرأه المحبه اللى اتعودت على كلمات الحبيب فعلا ممكن هموم تتشال و مصاعب تتعمل بحب و جبال تتشال بسهوله بكلمه منك ايها الحبيب الصامت

كلمات الأغنية
بكلمه منك .. تنسيني الي عدى آوام .تخليني احس بقيمة الايآم .. تطمني لسنين قدآمبكلمه منك .. توريني الي مش شيفآه .. تريحني من الهم الي انا شيلآه .. تعيشني الي مش عيشآه كآن فين .. هوآك من بدري يا حبيبي .وكل دآ فين .. دنآ من قبلك انا عايشه مع العايشين بكلم نفسي من الوحده بقآلي سنين .. وآنآ في ضيقتي مكنتش عارفه اشكي لمين ودي الوقت وانا بعمل حسآب بعدين .. ودي الوقت عرفت ابدآ حيآتي منين ......بكلمه منك عرفت انا دنيا معرفهاش.. عشان خطرك بحب حآجآت ماحبيتهآش.. ولو تندهلي مستنآش ...بكلمه منك لقيت كل الي مش لقيآه .. ولو في حد زعلني انا مسمحاه .. ولو فيه جرح انا حنساهكآن فين .. هوآك من بدري يا حبيبي.. وكل دآ فين .. دنآ من قبلك انا عايشه مع العايشين بكلم نفسي من الوحده بقآلي سنين .. وآنآ في ضيقتي مكنتش عارفه اشكي لمين ودي الوقت وانا بعمل حسآب بعدين .. ودي الوقت عرفت ابدآ حيآتي منين

4 comments:

Anonymous said...

عزيزتي

كلمات اغنيه شرين جميله و انا شخصيا من عشاق صوتها
بخصوص سؤالك احب اؤكدلك ان فعلا بكلمه من الشخص اللي بنحبه بنستريح و بنهدي حتي لو متعصبين
الحب مسؤليه مشاركه في الحياه

بستغرب فعلا من ان في فتره الخطوبه كل حاجه بتكون حلوه و خروجات و فسح و هدايا و هوب بعد الجواز العكس تماما عدم اهتمام بالمظهر و مفيش خروجات و لا هدايا و المناسبات السعيده بتتنسي فجأه و لما تسألي يقولولك مشاغل الحياه
مش كده يعني اوكي الدنيا مشاغل بس الواحده محتاجه كلمه حلوه هديه حتي من غير مناسبه
الحب محتاج اهتمام من الطرفين عشان يكبر
مانقولش ان مهما عملنا اللي قدامنا حيحبنا حتي لو مااهتمناش بيه لأ مسيره يوم و حيزهق عشان كده قبل ماليوم ده يجي لازم نعمل حسابنا و نحاول نهتم باللي بنحبه و نديله من وقتنا
تحياتي ليكي علي الاختيار الحلو للأغنيه و الموضوع الأحلي

مش فاهمه said...

عزيزتى أجندا معاكى حق بس برضه الكلام مهم جدا للمرأه و خصوصا المحبه و اللى واخده على الكلام الحلو مش عارفه الكلام مش مكلف خالص و مش محتاج مجهود و مع ذلك فى العادى بيبخل به الرجل ليه ما أعرفش
تحياتى ليكى و منوره البلوج

Anonymous said...

عزيزتي
انا معاكي في اللي بتقوليه و انا من الناس اللي مع ان الكلمه الحلوه بين اي اتنين بيحبوا بعض مهمه جدا و لو فيه خلاف حتي لو كان كبير ممكن بكلمه الميه ترجع لمجاريها زي مابيقولوا و زي ماقلتي الكلمه مش بتكلف حاجه بس المهم تكون من القلب عشان توصل القلب طوالي
تحياتي ليكي و اشكرك علي الترحاب
سعيده بالتواجد دايما في مدونتك
:)
صباح الفل
علي فكره الصوره بتاعت البروفايل عندك تري اوريجينال
:)
لذيذه

مش فاهمه said...

الصورة دى كانت عجبانى جدا لأنها مصريه صميمه بس بعد شويه فكرت لقتنى اخترتها فى اللاوعى لأنها شبه مرات البواب اللى قدامنا بالمللى :((