Saturday, December 20, 2008

لما النت عندى وقعت

بما انى مدمنه نت و معترفه و اعترافى سجلته هنا
بالتالى كان وقوع النت بمثابة صدمه بس لما فقت
منها ابتديت افكر فى امور عديده و نورت فى دماغى مناطق كتيره عازياكم تشاركونى فيها
- طبعا اكتشفت مساحه اكبر من الوقت للأتصال بالأهل و الأقارب و الأصحاب الحقيقين و محاولة الأطمئنان على قدرتى على التواصل مع ناس من لحم و دم شفتهم و شافونى مش شخصيات افتراضيه تكونت بينى و بينهم على مر الأيام مشاعر حقيقيه ين حب و كره و اعجاب و نقد و معارك مشتركه و مشاحنات يعنى هم افتراضيين بس مشاعرى انا حقيقيه حاجه تلخبط بجد يعنى ايه اللى يضمنى ان اللى باكلمه على انه رجل يبقى ست او ست تبقى راجل او صغير يبقى كبير او العكس و هل المواضيع دى حاتفرق ولا لأ حاجه تحير بجد
- اكتشفت فشل موضوع التأريخ الشخصى على النت يعنى ان الواحد يسجل خواطره و اراؤه و انفعالاته كل ده على النت سواء بمشاركات فى مواقع او على البلوج الخاص لأن فى لحظه ممكن كل ده يطير و يصبح هباءا منثورا اترعبت لما تخيلت ان تاريخ علاقتى بالنت و الشخصيات اللى ارتبطت بها نتيا كله ممكن يضيع و لا يبقى شئ ممكن اقرأه بعدين او اتركه لأولادى يشوفوا امهم كانت بتهبب ايه كل يوم و هى سايباهم و قاعده على النت تهاتى فى سياسه و دين و علم نفس و فى الأخر لو حدثت مشكله ما ابقى كأنى ماسكه الهوا بايديا
- اكتشفت ان غالبية الناس من حولى مش حاسه قوى بغياب النت ولا تأثيره و اكتشفت حكمة الدوله فى خفض اسعار النت علشان المثقفين و المهمومين بمشاكل وطننا و مجتمعاتنا و المعرضين للأكتئاب فى كل لحظه لو اعملوا عقلهم دقيقه انهم يلاقوا مكان مناسب جدا للفضفضه و تبادل الأراء و الحلول مع بعضهم البعض فقط و ممكن التدخل أحيانا من جانبها بشعلله بعض المواضيع او اطفاء مواضيع حيويه و هامه بتفريعها الى مشكلات جانبيه و صرف النظر عنها او اطلاق مشكلات مفتعله لتفريغ شحنة الكلام و الفضفضه و كل ده و الناس اللى بيعانوا حقيقة و بجد اصلا مش بيعرفوا يفكوا الخط مش يقعدوا على الكمبيوتر و يشوفوا ايه المشكله و حلها
- طبعا افتقدت ميزة قرأة الأخبار و الصحف على النت و لأنى على النت باقرأ مقالات الكتاب اللى باختارهم ...طبعا اضطرارى القسرى انى اشترى الجرائد المطبوعه جعلنى غصب عنى عينى تقع على مقالات باقلام كتاب و صحفيين خسارة الواحد يجيب اساميهم حتى
ياترى الناس فكرت فى ايه و عملت ايه لما النت عندهم وقعت

4 comments:

زمان الوصل said...

صدّقينى الموضوع مش موضوع نت :) الموضوع شئ ما يبحث الإنسان عنه دائما ليدمنه و يملأ فراغه ثمّ يصبح بعدها حجّته
للتذمّر من محدودية الوقت رغم أنّنا من يختار ما ينفق وقته فيه .. بدليل إن أمّى مثلا مالهاش علاقه بالنت ولا الكمبيوتر لكن لها إدمانها الآخر و هو الفرجه على المسلسلات التليفزيونيه !! لدرجة إنّى بقيت كل ما الريموت يقف على قناة مسلسلات و أنا متواجده أقول "كفايه مسلسلات بقى لو مفيش حاجه تانيه نتفرّج عليها نقفل التليفزيون و نتكلّم مع بعض أحسن" :)
طبعا هى أحيان تتضايق من كلامى و تقول لى "اشمعنى انتى بتقضّى وقت طويل قصاد الكمبيوتر و انا مش باعترض" و انا ردّى بيكون ان ده هربا من المسلسلات اللىّ شغّاله طول النهار و هكذا نظل نلف فى حلقه مفرغه لكن النهايه إن كل واحد عنده الحاجه اللىّ بيدمنها ..

انتى محتاجه الضمانات اللىّ بتتكلّمى عنها من نوعية اللىّ باتكلم معاه راجل ولاّ ست لو انتى تنوى تحويل علاقتك السايبريه بهم لعلاقه حقيقيه أو فيها لمسه شخصيه .. لكن لو ما يعنيكى ان تقرئى موضوعات تظل تفرض نفسها على تفكيرك حتى بعد اغلاق الجهاز مش هتفرق اوى .. خاصة مع عدم إمكانية التأكّد من صدق أى شئ تقرئيه ومن ثمّ لنتقبّلها كما هى و نريّح نفسنا .. ماتنسيش كمان ان ميزة الخصوصيه و إن كانت تحجب عنك معلومات لكنّها تعطيكى نفس الميزه و تحجب معلوماتك عن الغير فى الوقت اللىّ بتسمح لك بالنقاش معاهم بحريّه يمكن لا تتوافر فى العالم الحقيقى

موضوع التأريخ الشخصى كمان له حل .. تسجيل ما تكتبيه على وسائط غير قابله للتلف .. زى ما النت ممكن تقع و المنتدى يختفى بلمسة زر ممكن كمان الورق يحترق او يضيع او تصل اليه ايدى غير امينه !! ومن ثمّ ليه المقارنه بين الوسيطين المادى و التخيّلى و ليس الاستفاده من مزايا كلّ منهما و وضعه فى حجمه و اهميته الحقيقيه؟ انا قريت مرّه ان الواحد لو كتب حاجه و ضاعت ثمّ حاول اعادة كتابتها مرّه اخرى سيكتب فقط النقاط التى اقتنع عقله باهميتها فعلا دون اى حشو او لت و عجن زائد
.. و من ثمّ باتعامل مع الافكار و الكتابات التى ادوّنها بنفس الطريقه إلاّ قليلا ممّا قد لا تستوعبه الذاكره و يعجز العقل عن حصره .. يعنى لو لا قدّر الله ضاع ما تكتبيه سيظل بعقلك -ومن ثم يمكن اعادة تدوينه- اهم النقاط ..

حسّيت بغياب النت طبعا خاصة و قد حدث خلال الاجازه الاسبوعيه لكن خلال الغياب كانت فرصه لمشاهدة بعض البرامج -زى
حلقه من حلقات اوبرا- و لقيتها بتخلينى مستنيه عودة النت من اجل البحث فى موضوعات متعلقه بها و بموضوع الحلقه .. يعنى اللىّ بنعيشه فى الواقع ممكن نغذّى بيه حياتنا على النت و العكس صحيح .. المهم نحتفظ باتجاه رايح جاى بين العالمين :)
إحنا مشكلتنا إننا بنحاول نتصوّر كل شئ مثالى لأقصى درجه و أمّا نواجه بحقيقة إنّه مش مثالى نبتدى نشعر بالخديعه و نبالغ أوى فى الشعور ده لدرجه قد تنسينا مزايا و فضائل هذا الشئ اللىّ "قلبنا عليه" .. إمبارح كنت باتكلم مع احد اصدقائى و لقيته
بيقول لى ازاى ماتعرفيش الاخبار دى منشوره فى كذا جريده و لقيتنى باقول انى باقرا الجرائد كلها من على النت و من ثمّ امّا تقع النت ابقى ماعرفش اى شئ كنت باعرفه من خلال الجريده .. النت مهمه جدا و مفيده للغايه لدرجة انى اعتبرها ثوريه فعلا حيث يكفى جدّا خاصية البحث التى تتيح لك الحصول على صفحات و صفحات عن اى كلمه تخطر على بالك باى لغه !! اعتقد ان جعل المعرفه متاحه للجميع بهذا القدر من التساوى -الجميع اعنى بها جميع مستخدمى النت طبعا- شئ مبهر جدّا و بيوفّر على
الكثيرين مصاعب و متاعب جمّه كانت لتواجههم فى سبيل ان يعرفوا ما تتيحه لهم النت .. ومش مطلوب منها ان تتغلب على خطايا البشر التى ستظل تلازمهم اينما وجدوا مثل ان يدّعى رجل أنّه امرأه أو يمارس بعضهم التجسّس على غيرهم و ما يشبه من رذائل ارتبطت بالبشر اكثر ممّا ارتبطت بالوسيط ..

تخفيض اسعار النت باعتبره حاجه كان مفروض تحصل من زمان بس تاخرت للرغبه المعتاده من البعض فى ممارسة الجشع و
الاستغلال !! زى بالظبط اسعار المحمول اما بدات باسعار و ارقام فلكيه غير مبرره و انتهت الى ما انتهت اليه بعد ما اصحاب الشركات اكلوا و شبعوا و بقلظوا و لظلظوا و بقى ممكن يتركوا بعض الفتات .. الفكره بقى ان المثقفين اللىّ بجد ليه يتركوا الدوله تتلاعب بهم بهذا الشكل !! لو كانوا مثقفين بجد كان مفروض مايحصلهمش كده ..

حاليا الفكره التى تسيطر على بالى احتياجنا الشديد لمجله شبه مجلة "ريدرز دايجست" الواحد يقراها فيحس انه اخد جرعه معتبره من الثقافه و الاطلاع و تعمل ترشيحات حقيقيه للكتب التى تستحق القراءه و اعادة عرض للكتب القديمه اللى الناس بطلت تقراها
مش المجلات و الصحف و الكتب الهفأ التى تملأ أكشاك الجرائد ولا تستحق حتى ان ينظف بها الزجاج !!

زمان الوصل said...

يا لهوى إيه الرد ده هو طلع طويل كده ليه !!!

مش فاهمه said...

عزيزتى زمان الوصل
البلوج بلوجك و دايما بتشرفينى بجد اكتبى زى ما نتى عايزه و اختلفى معايا زى ماانت عايزه وانا حأرد عليكى واحده واحده بس شويه كده النت تسرع شويه و ننطلق فى الكلام

FrUiTa said...

مساء الخيرات
اسمحولي ادخل بينكم واشارك معاكم في الموضوع
مش عارفه ليه اتخضيت لما قلتي ان ممكن كل حاجه تتمسح .. فضلت افكر كتير، في ناس بتكتب لنفسها (زي اختك فروتا) بس كل كلام بيجي مع ظروفه مش عارفه لو حاجه اتمسحت حاجيب ظروفها واكتبها تاني ازاي

بالنسبة للنت .. انا مش مدمنة نت، بس النت مهم جدا بالنسبة لي لأني بحب ابحث عن حاجات كتير، في حاجات بسمع عنها، حاجات بقرا عنها بحب اني اوسع معلوماتي عن طريق النت
غير كدا بحب اقرا ىخر ما كتب في المدونات .. اشوف الناس بيتكلموا في ايه ومزاجهم عامل ايه وشاغلهم ايه.

لما النت وقعت بقى . رحت استغليت الوقت ووضبت مكتبتي الخاصة ونفضت الغبار عن كتب كنت نسيتها تقريبا .. واتفرجت على صور رجعتلي ذكريات جميلة

غير كدا لقيت وقت اجلس فيه مع نفسي اعيد بعض الحسابات مش كلها طبعا .. لغيت افكار وصححت افكار .. وسمعت مزيكا ريحتلي أعصابي

تحياتي ليكي ولزمان الوصل .. بستمتع اوي لما بقرأ ليكم وبحب اوي تفاعلكم مع بعض